في كل عيلة توجد مثل هذه الشخصيات

في كل عيلة توجد مثل هذه الشخصيات التي تضفي على الجلسات ألوان معينة .....شوفوها :

الشخص الخفيف الدم اللي بيسلي القعدة

و عادة بيكون لسانه زفر شوي و مسموح له يحكي شو ما بده طول ما هو عم بيضحك بالبشر و هو اللي خالد لما يخطب لميا بيحكيلها عنه "لو تشوفي ابن عمي زياد نهفة بموتك ضحك ".....وبيجي زياد عالقعدة نافخ ريشه لانه عرفان شو بينحكى وراه وشو ما حكي زياد الكل بيضحك حتى لو قال صباح الخير!!!!!!!
نمامة العيلة

و هاي عادة بتكون زوجة احد الاعمام او اولاد الاعمام ... ما بعرف ليش ما تسالوني؟؟؟ هاي اللي عندها الاخبار دايما واخبارها لازم تشيل نصها وتصدق نص اللي شلته مشان توصل للحقيقة بتبهر و بتفلفل على كيفها و بتضيف من عندها بيحبوها النسوان و بيكرهوها و بنفس الوقت بخافوا منها بتحس هيي بأهميتها لما حدا يسألها شو الاخبار وبتفرد حالها و بتبلش تذيع و بالاخر بتقولك "بالله ما تجيبي سيرة اني قلت لك انا شو دخلني ,بتعرفيني :بمشي الحيط الحيط و بقول يا رب السترة "!!!!!!!!
غني العيلة

كل عيلة فيها واحد بيكون اغنى من الكل وبكل عيلة بتكون مرته مركز نظر النساوين شو لبست ووين راحت و شو عملت و بتكون نمامة العيلة متل الدنب الها مشان تجيبلهم الخبر اليقين بتحكي من طرف مناخيرها وبتقعد عطرف الكرسي كانها أرفانة واذا بتضيفها شي يا بترفضه يا بتاخده بس ما بتاكله ع اساس انها شبعانة ببيتها كلامها واحاديثها لا تتعدى شو عملت الفلبينية ...وكيف تقاتلت مع السيرلنكية.....و اديش الشوفير منشف دمها....يعني كمان شوي بتحزن عليها ......
كبير العيلة

و هذا اللي بدك تسد بوزك و تسمعه و هو بيعيد القصة مرة ورا مرة ورا مرة ورا مرة........................................
بيحكيلك قصص ايام الحصيدة و الثلجة الكبيرة و لما كان بالجيش نص قصصه كذب بكذب او مبالغ فيها (بقولو ما اكذب من شاب تغرب الا ختيار ماتت اجياله )
كان رح يشتري نص البلد وفندق ومطعم إنعرض علية بالف ليرة لما كان كيلو اللحمة بعشرين قرش!!!!! وووووووووو......... وخليها لربك

دكتور العيلة

و هذا المسكين اللي ما بيتهنى بقعدة بس يوصل لمحل بيلتموا عليه و يا امي خواصري عم يوجعونيو شوف يابا مبارح و انا لما ...(و بيصير يوشوشو).
و اللي بتنادي ابنها تعال ورجي الدكتور حلقك هاتي معلقة يا غدير خليه يشوف زلاعيم اخوكي ......واللي بيعرض عليه روشتات دكاترة تانية واللي بيجيب له صور اشعة وااللي بقولوا شوفلي ضغطي (طبعا كل القاعدين بفحصوا ضغطهم بعده!!!!)... و كل حياته بتكون هيك بغض النظر ان كانت زيارة او عرس او حفلة ....طبعا هو ما بيقصر وممكن يصير يقولك مين الحمار الي اعطاك هذا الدوا ارميه و بيكتبلك غيره....

متغرب العيلة

كل عيلة فيها على الاقل واحد برا البلد بيجي بالصيف و الكل بيكون يستنى الهدايا لما يوصل بيلاقي الكل متجمع و الكل بيسلم عليه و بتكون امه عاملتله ورق عنب و كوسا و شباب العيلة بينلموا و اشتقنالك يا ابو الزوز و شفلنا شغل معاك و الله اخوك ما لاقي ياكل كأنه المسكين صاحب شركة هنيك....
طبعاً الخرط بيشتغل من طرفه و بيحكيلك عن سيارته البورش و بيته الفيلا و بيكون عايش مع تلاته بغرفة !!!!
>>>>>>بعد يومين بتلاقيه قاعد عالبلكونة بالشيال لحاله بيشرب شاي ولا حدا سائل فيه و امه بالمطبخ عم تعمل مجدرة .........

عزابي العيلة

أو الدون جوان النسونجي .....
بيكون حليوة نسبيا طبعاً و بس يزور حدا من القرايب عندهم بنات بينضبوا وبيصيروا يبصبصوا عليه من بعيد و بتشتغل المسجات....
هاد بيكون عنده شوية غرور على شوية عجرفة بيقعد و بيحط رجل على رجل و عادة بيصير عمره فوق الاربعين و ما بيتجوز وبكل قعدة بيحكي عن غرامياته و بيتجمعوا حواليه شباب العيلة و بيصير يفرجيهم صور و مسجات......

شقفة العيلة احلى بنت بالعيلة

بتكون محط انظار اولاد العم و الخال بس هيه نظرها بعيد شوي بتمشي يا ارض اشتدي ما عليكي قدي و بتقعد مع نساوين العيلة حتى يصيروا يمدحوا جمالها كمان متل دون جوان العيلة ما بعجبها العجب و بتطوّل لتتجوز اذا تجوزت اصلاً....
ما بتكون صحبة مع بنات العيلة و بتلاقيها دايما في الاعراس بتتلقط عريس من بعيد من مبدأ نفسي فيه و تفو عليه !!!!!!!

كمبيوترجي العيلة

هذا طبعا بعد طفرة الكمبيوتر صار له اهمية كبيرة.... بالاول كان الفاشل التافه اللي ما بيعرف شي ووضعه متل دكتور العيلة و بتقول امه بكل خيلاء "بس يجي علاء بيزبطلك الكومبيوتر و الله ما في اشطر منه مبارح خلانا نشوف عمرو دياب" وبيجي علاء المسكين ....."شوف كمبيوتر ابن خالتك اللعبة ما عم تشتغل" و بيجي حمودة و بيقعد يتفرج على علاء مثله الاعلى بالحياة وهو بيشغّل الكومبيوتر وينبهر حموده و بيفهمه علاء انه مشان تقدر تلعب اللعبة لازم بالاول تشغّل الكومبيوتر!!!!!!!!!

طفل العيلة الموهوب

هذا اللي بكل لمة بنادوه "يغني تعال عبود غني لعمو اغنية اليسا لو تشوفو كيف بغنيها".....
وطبعاً في نوعين من عبود في عبود اللي مابيستحي و بقرفك و هو بيعيد الاغنية و امه فرحانه فيه و كل شوي بتقول ما شاء الله كأنه ما حدا خلّف غيرها او النوع اللي بتطلع روحك وأمه عم تحاول تقنعه يغني و ياللا فرجي عمو اديش انت شاطر و بتصير انت بدك تخلص بتقوله غني حبيبي بعطيك شوكولاتة و بيكون بجيبتك شوكولاتة مفعسة من عرس قديم بتفرجيه ياها كنوع من الاغراء وفي حالة كان دكتور العيله قاعد بيجي التهديد المباشر اذا ما بتغني بخليه للدكتور يضربك ابرة ها....



ياترى مين انت بالعيلة....................

يسلمو

شكراا عالموضوع

يسلمو ايوش

يسلمو ايوشتكا
موضوعك رائع

يسلمو ايوشتكا
موضوع حلو كتير

يسلمو ايوشتكا موضوعك جميلللللللللللللللل

يسلمو

ميرسي عالمرور
ولكم

يسلمو